عاقلة يا عمري على داك النهار
ملي غم علي قلبي ومالقيت صبر
نويت نقول ليك اللي فبالي يا العمر
نبغيك ولو ختمت بيها آخر المشوار
رجفو صباعي ولساني ما طاوعني
بغيت نحرك لساني مالقيت كيف نهضر
الحب زلزلني ياربي وقلبي ياويلو عْمَر
بغيت نقول نبغيك يااللي من نومي حارمني
بديت ندس فكلام العشق وسط الكلام
نهمس بصوت دافي ونزيد نعبّر
نلمح بكلام الحب وياريتني نقدر
نقولها فوجهك نبغيك وقتلني التخمام
هضرنا والكلام جاب خو كلامو
عييت نكميها فصدري وقلبي تقهر
عييت وتهديت ياربي وتقاضى الصبر
قلت نقولها ونهنى ويهنى قلبي فمقامو
فكرتك فاول نهار هضرنا وتوالمنا
فرواحنا اللي تعانقت يانور البصر
فحبنا اللي فالقلب كبر وازهر
قلت نبغيك وشاهد ربي اللي خالقنا
جاني جوابك زعزع خاطري كي الزلزال
قلتي حديث يذوب الصخر والحجر
جمدني كلامك يالعمر واللسان حسر
قلتي نبغيك عمري وحبك ماتحصيه رمال
يوم قالها قلبي وجاوبو قلبك فالآن
قلت ليك نبغيك فوق ما تتصور
قلتي لي نهواك وعلى فراقك مانقدر
كان احلى يوم فعمري يا اغلى انسان
الخميس 3 فبراير 2011 - 8:42
